تجربتي ف السفر لاقصر واسوان بدون شركة سياحة

السلام عليكم

هحكي تجربتي ف السفر لاقصر واسوان بدون شركة سياحة او اي مكاتب او اشخاص وببادجت قليلة الى حد ما ، هي مفرقتش كتير عن كروز مع مكتب بس الميزة الوحيدة انك بتكون فري ف وقتك تعمل اللي انت عاوزو تخرج تاكل وقت ما تحب مش مرتبط لاشخاص او مواعيد.

اولا بفضل الله ، وبوجود مستر Samuel Nabil المرشد اللي كان معانا مكناش عرفنا نعمل اي حاجة
شخص محترم ربيحافظ ع الجيست اللي معاه وبيوعيك تتعامل ازاي مع البياعين وكل حد ممكن ياخد منك فلوس مقابل اي خدمة باختصار انت الاهم عنده وسلامتك وراحتك من اول اولوياتو كان معانا ف اقصر واسوان ، الحساب حسب الاتفاق معاه ومش مادي ابدا ، اجرهُ حسب الاتفاق معاه

مبدايا في مصاريف بتكون مشتركة فكل ما العدد بقا اكتر كا ما المصاريف تكون قليلة احنا كنا تلاتة
ركبتا الجمعة اللي فاتت قطر النوم بيطلع من رمسيس ٧.٣٠ مساء تذكرته ب ٣٠٠ ج شامل وجبة عشا مرفق صورتها الحجز بصورة البطاقة من رمسيس قبل السفر بعشر ايام او اسبوع وممكن اي حد يحجزلك عادي بصورة البطاقة ع الموبيل حتى، بس لو انتو م الناس اللي مش متعودين تنامو ف المواصلات يبقى بلاش منه لانه هيكون تكلفة ع الفاضي وممكن تستبدلو بال VIP تانبة ب ١٣٥ معقول بردو لاننا رجعنا فيه كان حلو ، قطر النوم بس فايدته ف الخصوصية لو البنات ممكن تفك الطرح او ف للعموم تريح ضهرك بس شوية لكن غير كدة ولا حاجة
وصلنا الاقصر ٦.٣٠ الصبح تقريبا
كنت دخلت ع موقع بوكنج وشوفت الفنادق وعجبني فندق اسمه نيو بولا بس محجزتش من ع بوكنج لان بيكون اغلى سرشت ع اسم الفندق ع النت وجبت رقمهم وانصلت واداني الميل وحجزت بالميل الشخصي عادي جدا قبل السفر بعشرين يوم ، الفندق تلات نجوم وممتاز وع النبل ونيضيف ب ٣٥٠ ج ف الييلة شامل افطار
وصلت المحطة خدنا تاكسي بعشرين ج للفندق فكرتو بالميل ودفعت الفلوس وسكنا
حطينا الشنط ونزلنا خدنا تاكسي بعشرين ج لمعبد الكرنك اللي تذكرته ب ١٠ ج زورناه خلصنا طلعنا ركبنا ميكروباص بجنيه وربع للفرد نزلنا عند مطعم اسمه عبودي الفيو بتاعو معبد الاقصر، هو جنب ماكدونلدز بس انا مبحبش ماكدولندز ولا كنتاكي ولا اي برندات مطاعم او كافيهات ، اتغدينا فيه الفرد من ٣٥ ل ٦٥ حسب ما تختار والعصير فيه بعشرين وصلينا الضهر والعصر قصر عندهم
نزلنا م المطعم روحنا المرسى قدامو بشوية كدة اخدنا مركب موتور ب ١٢٠ وانتو وشطارتك ممكن ميا حاولو ، روحنا جزيرة الموز مغهاش حاجة غير شجر موز واول ماتوصل يقابلوك بسباطة موز مجانا القعدة هناك لذيذة والمشاريب معقولة شاي بخمسة منجة تقريبا خمستاشر او عشرة كدة يعني وممكن تتمشى شوية ف المزرعة ، طبعا منحاسبش المركب الا واحنا راجعين كان مستنينا طلعنا ركبنا رجعنا ع الناحية التانية ركبنا تاني بجنيه وربع ورجعنا الكرنك حضرنا الصوت والضوء تذكرته ب ٢٥ ج تحفة ممتع للي زي حالاتي ومحضرش صوت وضوء قبل كدة في تلات عروض ستة لسبعة سبهة لتمانية تمانية لتسعة اعتقد الاخير للاجانب خلصنا وطلعنا ركبنا مكروباص بجنبه وربع نزلنا عند المطاعم والمحلات ع الكورنيش جبنا عيش فينو م الفرن وطعمية سخنة بس كانت وحشة دوقو قبل متجيبو لاني نسيت اسم المحل ، وجبنة وقعدنا ع الكورنيش اكلنا والجو كان يجنن بعدين اتمشينا لعند الفندق نمنا وصحينا الصبح ميكروباص بجنيه وربع لعند المعدية اللي بنص جنيه للفرد تحفة بدورين ركبنا ف ادور التاني ده نص جنيه لازم ناخد احسن ما في المكان
عدينا البر الغربي اتفقنا مع عربية بتسعين جنيه لااااازم الاتفاقات قبل اي حاجة كان ممكن تخلص ب ٧٥ بس لقيت المشوار بعيد جدا فاديتو تسعين ودانا وادي الملوك عبارة عن مقابر بس عميقة ف قلب الجبل حاجة كدة تمخول الدماغ تقول عملوها ازاي ، التذكرة للفرد ب ٢٠ ج ل تلات مقابر وطفطف ب ٤ ج للفرد، وهيخيرك بمقبرة رابعة لوحدها ب ٢٥ ج بس مروحنهاش واكتفينا بقراية الفاتحة للمرحوم دول ٢٥ ج مبلغ بردو 😄😄
خلصنا وادي الملوك رجعنا للعربية ودانا مغبد حتشبسوت تحس من جمال المعبد انها كانت ليدي ورقيقة بجد المعبد ناعم كدة وجميل وتذكرة دخولو ١٠ ج للفرد و٢ طفطف للفرد خلصنا ورجعنا للعربية ومشنا رجعنا للمرسى مكان ما خدنا عدينا ف مركب موتور بعشرة ج اتغدينا وانمشينا ف البلد والسوق وووو وحجزنا القطر لاسوان vip مكيف ب ٦٠ ج وصلنا اسوان عشرة تقريبا في مطعم جنب المحطة بشوية اسمه الىونش بيعمل سندوتشات اشترينا بعشرين جنيه وطلعنا ع الفندق اللي كنا حاجزينو من الاقصر اسمو حتحور ع النيل ع طول ب ٢٥٠ بعد الفصال لانه ب ٣٥٠ بس طبعا مش بنضافة وجمال نيو بولا ف الاقصر ، حسنته الوحيدة انه ع النيل بس مكنش واو يعني ، في فندق اسمو اوسكار جوا شوية مش ع النيل انضف منه ونفس السعر
المهم سكنا اليوم ده وصحينا الصبح اتمشينا لعند موقف كدة ركبنا ميكروباص ب ٢.٥ لعند اخر خط المكروباص بس اتفقنا معاه نفضل معاه يودينا السد ورمز الصداقة وخد خمسين روحنا السد تذكرته بعشرة جنيه هي مكتوب عليها ٢ ج بس بيختموها ختم عشرة ج شوفنا السد وجمال بحيرة ناصر وقعدنا شوية ف جو راءع ورجعنا للسواق ودانا رمز الصداقة تذكرته عشرين ج طلعنا فوق بالاسانسير يشبه برج القاهرة حاجة كدة حلوة اتصورنا وووو ونزلنا للسواق ودانا عند موقف كدة ركبنا منه ميكررياص ب ٢ ج نزلنا ف مكان كدة خدنا منه توكتوك بعشرة جتيه لمعبد فيلة اللي تذكرتو ب ١٠ ج للفرد وبتاخد مركب ب ٨٠ ج واكرامية ٢٠ بيودينا للجزيرة اللي عليها المعبد المركب ممكن يشيل ٨ يعني كل ما عددنا زاد التكلفة تكًن اقل على كل واحد ، خلصنا المغبد ورجعنا ف نفس المركب وبعدين توكتوك ب ١٠ ج وبعدها تاكسي ب ٣٠ للقرية النوبية ممكن نستغى عن التاكسي ب توكتوك بعشرة ج
روحنا بيت نوبي اسمه اونتي كا ، اتغدينا بطاطس بامية ملوخية رز فراخ في برامات كدة وطعم اكلهم يجنن مش عادي الوجبةللفرد حسب البيت وحسبالاتفاق ، والبيت راءع فتحولنا اوضة صلينا فيها نضيف جدا بس غالي سالنا ع الاوضة التريبل ب ٩٠٠، خلصنا غدا وقعدة تجنن نزلنا المغرب اتمشينا ف السوق النوبي واشترينا هدايا وبهارات ، الفصال ثم الفصال ثم الفصال متنسوش
ركبنا توكتىك بعشرة جنيه لاول كوبري الخزان ومن هناك مكروباص ب٢.٥ لوسط البلد روحنا حجزنا نذاكر القطر للرجوع (اه قبل السفر بيومين عشان نضمن نلاقي مكان) التذكرة ب ١٣٥.٢٥ vip مكيف درجة تانية حلو مش وحش وحمامه نضيف
بعدين اتمشينا ف سوق اسوان واتقرجنا ع البلد وخدنا عيش فينو وميا وطلعنا الفندق عملنا سندوتشات جبنة من الللي جيبنها معانا (احنا اواريب وبنوفر) 😄😄
وتاني يوم الصبح صحينا بدري نزلنا الساعة ستة روحنا موقف قريب للفنق ركبنا منه ب ٢.٥ للفرد ودانا موقف الاقاليم ركبنا منه ب ٤٠ للفرد ودانا ابو سمبل مشوار صعب حوالي ٣٥٠ ك ف صحراء جرداء ، خدو معاكو حاجة تداري الشمس ف المكروباص لانه بيكون من غير ستاير ومش مكيف المكروباص المكيف بيكون عن طريق شركة سياحة مستر صمويل اكيد عارف ممكن يظبطها
وصلنا البلد جبنا ميا وزبادو ( اختياري😄😄 ممكن تجيبو بيبسي انا جبت زبادو عشان الدايت 😄 ) وخدنا تاكسي بعشرة ج للمعبد ابو سمبل تذكرة الدخول ١٠.٥ واكرامية للطفطف زي ما تحبو
هما معبدين معبد رمسيس وجنبه معبد صغير كان بانيه لزوجتو نفرتاري ( راجل چنتل)
طبعا المنظر هناك يرد الروح لان المعابد ع بحيرة ناصر والجو تحفة خلصنا معابد قبل الساعة ١ وده مهم لان في اتوبيس مكيف ومريح جدا ب ٤٠ ج بردو بيرجعك اسوان
اتصلنا بالتاكسي اللي جابنا جه خدنا م المعبد للموقف وانغدينا هناك ف محل سمك ب ٣٥ ج الوجبة فيها رز وسلطة وطحينة وتلات قطع فليه كان طعمه حلو
قطعنا تذاكر الاتوبيس وركبنا ورجعنا ... نركز ف معادو بيطلع واحدة الضهر بالظبط
في مسجد ف المكان للي هيصلي الضهر
وصلنا اسوان تقريبا الساعة خمسة طلعنا الفندق قعدنا شوية ونزلنا اتمشينا ع الكورنيش في عربية بتعمل حاجة كدة طعمها تحفة بعشرة جنيه كنافة ع بطاطا وصوصات وفاكهة ، موجودة قدام فتدق ستي ماكس
بعدين روحنا جبنا ميا وفينو وبيبسي وطلعنا ع افندق متنسوش الجبنة اللي جيبينها معانااكيد مش هناكل عيش حاف 😀
اليوم التالت ف اسوان اتفقنا مع عم محمد راجل طيب كدة مراكبي عملنا جولة ف النيلب ١٠٠ ج وودانا جزيرة النباتات تذكرتها ب ٥ ج بس تجنن تحس انك ف الجنة واستنانا ع مرسى اخر الجنينة ركبنا وودانا عند فندق كتراكت اللي معروف باسم جراند اوتيل بصراحة الوقت كان ممتع وخصوصا ان مركبه شراع مش موتور لان العادم بتاع الموتور بيبقى رزل شوية وكمان المتعة ف بطء المركب الشراع ، عم محمد رقمه ٠١٠٦٧١٩٩٤٠٤ بس فونو بايظ فلو مقفول هتلاقوه ف كافيه صلاح الدين ع الكورنيش اسمه محمد علي
خلصنا جولة نيل وطلعنا اتغدينا غدا حلو عشان بنودع اسوان ومسافرين اتمشنا وروحنا ع المحطة ركبنا ستة وصلنا رمسيس ستة
مهم يكون معانا فرشة اسنان معجون مشط شامبو بلسم فوطة دفاية سرير كيس مخدة شوز مريح مريح مريح
الاتفاقات مع المراكب والتكاسي تكون قبل الركوب والحساب بعد الانتهاء من الجولة
نسيت اقولكو اننا ف الاقصر ركبنا حنطور ب ١٥ جنيه بس مش فاكرة ليه
مستر صمويل ممكن يصححلي اي حاجة نسيتها
مرفق صور لكل اللي قولتو وكل صورة تحتها شرحها