هنتكلم عن أسعار تصوير المنتجات بشكل عام

مساء الخير عليكم جميعاً :D
النهاردة هتكلم عن موضوع مختلف تماماً.. حيّر ناس كتير سواء عُملا بيتضحك عليهم أو مصورين مبتدئين وبرضوا بيتضحك عليهم.

هنتكلم عن أسعار تصوير المنتجات بشكل عام بتتحسب ازاي وانت كعميل قدامك الإختيار وانت كمصور قدامك تحدد سعرك المناسب.

هبدأ بالعميل علشان هو اللي بناخد منه فلوس المَم :D
الفترة الأخيرة في كذا عميل كلمني ومقهور ومضحوك عليه من مصور :\
يعني ايه مضحوك عليه من مصور؟!!!
العميل يكتب بوست "عندي منتجات وعاوز أصورها" على جروب مصورين مثلا أو على أي جروب فـ يلاقي سيـــل من الكومنتات وكمية منشن رهيـــــبة لمصورين.. فيقوم العميل مختار أول واحد بعت له ع الإنبوكس :D
طب اخترته ليه؟؟!!!
أصله بعت لي صوره وطلعت تحفــــة، حاجة كدا تخليك تقول الله وبسم الله ما شاء الله عليه مصور شوية كابلز فـ المنتزة ف اسكندرية تحفــــة :D
وهنا العميل اتضحك عليه واللي بيحصل كالآتِ يروح مصر الأفراح والبورتريه يصور المنتجات وفرحان وبتاع وهوووووب الصور كلها سيئة :\
نبدأ بقى اسطوانة انت ضحكت عليا والصور وحشة والتمن يقل وووووو

طب الغلط هنا حصل ليــــه؟؟؟؟
الغلط حصل علشان العميل مش عارف ان في تخصص اسمه product photography ودا تخصص كامل ف التصوير حاجة كدا شبه دكتور المخ والأعصاب :D

ومشاكل تانية كتيـــــر بتحصل بتدور في محيط انعدام التخصص.
ونتيجة المشاكل دي وان العميل اتضحك عليه مرة .. بيحاول يستنصح بعد كدا ويبدأ يخسف ف الأجر..

طيب أنا لو عميل أعمل إيه علشان ما يتضحكش عليا ومنتجي يتصور بشكل احترافي أو بالبلدي كدا يتصور صورة بياعة ؟

هتعمل شوية الحجات التانية :D
- لازم تدور على المتخصص وبعد ما تدور ع المتخصص لازم تكون عارف ان التخصص ليه تمن.
- تبدأ تدور ع المتخصص المتميز ودا سعره أعلى شوية.
- قبل ما تبدأ شغل لازم لازم تشوف شغل المصور دا قبل كدا ف تصوير المنتجات.
- حاول تعرف المصور دا اشتغل فين او عمل شغل لمين قبل كدا وتشوف الشغل دا.

كلامنا مع المصورين وازاي تحدد سعرك كمصور وانت كعميل تفهم ليه اسعار التصوير انت شايفها غالية.. كل الكلام دا هنتكلم عنه المرة اللي جاية.

منشنوا أصحاب العمل والمشاريع :D العملا يعني :D